विप्लव, घनश्याम र जनार्दनको संयुक्त आह्वान : ‘पुरानै संरचनाले अब चल्दैन, नयाँ विकल्पतर्फ जाऔं’

काठमाडौं । नेपालका तीन राजनीतिक नेताहरू — नेकपाका महासचिव नेत्रविक्रम चन्द ‘विप्लव’, नेकपा (एकीकृत समाजवादी) का महासचिव घनश्याम भूसाल र प्रगतिशील राष्ट्रिय अभियानका संयोजक जनार्दन शर्माले नयाँ राजनीतिक पहलका लागि संयुक्त आह्वान गरेका छन्।

शुक्रबार सार्वजनिक गरिएको संयुक्त वक्तव्यमार्फत उनीहरूले हालको सत्ता नेतृत्वलाई गैरजिम्मेवार ठहर गर्दै, देशलाई नयाँ राजनीतिक विकल्पतर्फ अघि बढाउन आग्रह गरेका छन्। वक्तव्यमा राजनीतिक दलहरू जनताको अपेक्षाबाट टाढा गइरहेको र पुरानै संरचनाले अब देश चल्न नसक्ने उल्लेख गरिएको छ।

तीन नेताहरूले भदौ २३ गतेको ‘जेन-जी आन्दोलन’ र त्यसपछिका घटनाहरूले परम्परागत दलहरूको असक्षमता उजागर भएको टिप्पणी गरेका छन्। वक्तव्यमा भनिएको छ, ‘पुराना दल र तिनका नेताहरूले पुरानै संरचना र तरिका जोडजाड गरेर आफ्नो वर्चस्व बचाउन खोज्नु मुलुकलाई अझ संकटतर्फ धकेल्ने कार्य हो।’

जनताको गहिरिँदो निराशा र बढ्दो राष्ट्रिय असुरक्षाबारे चिन्ता व्यक्त गर्दै वक्तव्यमा देशलाई प्रगतिशील र लोकतान्त्रिक दिशातर्फ लैजान अब बृहत् मोर्चावन्दी आवश्यक रहेको निष्कर्ष निकालिएको छ।

नेता विप्लव, भूसाल र शर्माले भनेका छन्, ‘राष्ट्रमाथि आएको चौतर्फी संकटको सामना गर्न सबै प्रतिवद्ध कम्युनिस्ट, समाजवादी, प्रगतिशील र देशभक्त शक्तिहरू एकताबद्ध भई ऐतिहासिक पहल लिनुपर्छ।’

उनीहरूले समान विचार र प्रतिबद्धता भएका सबै पक्षसँग संवाद, छलफल र सहकार्यका लागि पनि आह्वान गरेका छन्। राजनीतिक विश्लेषकहरूले यस संयुक्त वक्तव्यलाई नेपाली वाम राजनीतिमा नयाँ पुनर्संरेखन (realignment) को संकेतका रूपमा लिएका छन्।