भक्तपुर । अतिरिक्त क्रियाकलाप शैक्षिक उन्नतिका संवाहक हुन् यसका माध्यमबाट विद्यार्थीहरुको सर्वाङ्गीण विकास हुनका साथै मानसिक क्षितिज फराकिलो बनाउन सकिन्छ भन्ने विश्वव्यापी मान्यतालाई आत्मसात गर्दै अगाडि बढिरहेको विनायक शिक्षा निकेतन इङ्लिस स्कुल ,मध्यपुर थिमिमा मङ्सिर २८ गते शुक्रबार अन्तरसदनात्मक हाजिरी जवाफ प्रतियोगिता सम्पन्न भएको छ ।
कक्षा ४ देखि ७ सम्मको जुनियर ग्रुप र कक्षा ८, ९, १० को सिनियर ग्रुप गरी दुईवटा समूहमा विभाजन गरी गरिएको उक्त कार्यक्रममा विद्यार्थीहरूले आफूभित्रका क्षमता र प्रतिभालाई प्रदर्शन गरेका थिए । विद्यालयका सहायक प्रिन्सिपल प्रेमप्रसाद निरौलाको सभापतित्व तथा विद्यालयका प्रिन्सिपल सुरेन्द्रबिक्रम प्रजापतिको विशेष अतिथ्यमा सम्पन्न भएको उक्त कार्यक्रम विद्यालयको इसीए बिभागको संयोजनमा आयोजना गरिएको थियो ।
सो कार्यक्रममा जुनियरतर्फ कन्चनजंगा सदन र सिनियरतर्फ माउन्ट फिस्टेल सदन उत्कृष्ट रहन सफल भए । कार्यक्रम पश्चात विजेताहरूलाई पुरस्कार वितरण गर्दै विद्यालयका प्रिन्सिपल सुरेन्द्रविक्रम प्रजापतिले प्रतिभा सबैसँग हुन्छ तसर्थ प्रतिभावान व्यक्तिले आफ्नो क्षमता बाहिर ल्याउन प्रयत्न गर्नुपर्छ र मेहनती र परिश्रमी व्यक्ति मात्र सफल हुन सक्छ भन्ने धारणा राख्दै सबैलाई बधाई ज्ञापन गरको सोे कार्यक्रम विद्यालय संयोजक शैलेन्द्र भट्टराई तथा शिक्षिका लक्ष्मी केशरी प्रजापतिले सञ्चालन गरेको थियो भने व्यवस्थापन र संयोजन इसीए संयोजक शिवहरी प्रजापतिले गरेको थियो ।
