‘स्क्विड गेम’ सिजन ३ काे नेटफ्लिक्समा नयाँ कीर्तिमान

एजेन्सी । दक्षिण कोरियाली चर्चित ड्रामा ‘स्क्विड गेम’ को तेस्रो सिजनले रिलिज भएको तीन दिनमै नेटफ्लिक्समा ऐतिहासिक सफलता हात पारेको छ। यो सिजनले ६ करोड १ लाख भ्यूज प्राप्त गर्दै नेटफ्लिक्सको गैरअंग्रेजी भाषाका सबैभन्दा धेरै हेरिएका कार्यक्रमको सूचीमा नवौं स्थानमा प्रवेश गरेको छ।

‘स्क्विड गेम’ सिजन ३ हालसम्मको पहिलो श्रृंखला बनेको छ जसले विश्वका ९३ देशहरूको नेटफ्लिक्स टप १० चार्टमा पहिलो स्थानमा स्थान बनाउन सफल भएको छ। यो सिजन २०२५ जुन २७ मा रिलिज भएको थियो र यसको कथावस्तु तथा पात्रहरूले दर्शकमा गहिरो प्रभाव पारेका छन्।

विश्वव्यापी प्रचार अभियान र फ्यानको सहभागिता

नेटफ्लिक्सले यो सिजनको प्रचारका लागि बृहत् विश्वव्यापी अभियान सञ्चालन गरेको छ। न्यूयोर्क, लन्डन, म्याड्रिड, सिड्नी र सियोलमा आयोजित ‘स्क्विड गेम: द एक्सपेरियन्स’ नामक फ्यान इभेन्टहरूमा करिब ५ लाखभन्दा बढी दर्शक सहभागी हुने अनुमान गरिएको छ।

त्यस्तै, मेक्सिको, मलेसिया, जर्मनी, थाइल्याण्ड, ताइवान, र अष्ट्रेलियामा समेत पप–अप प्रचार कार्यक्रमहरू आयोजना गरिनेछन्।

‘स्क्विड गेम अनलिस्ड’ नामक मोबाइल गेम १०७ देशहरूमा फ्री एक्सन गेमको श्रेणीमा नम्बर १ स्थानमा पुगेको छ। साथै, नेटफ्लिक्सले क्रक्स, प्यूमा, जोनी वाकर, र डोमिनोजलगायत १०० भन्दा बढी ब्रान्डहरूसँग मर्चन्डाइजिङ साझेदारी गरेको छ।

कथावस्तु र दर्शक प्रतिक्रिया

सिजन ३ ले मुख्य पात्र गी–हुनको कथा अघि बढाएको छ, जहाँ उनले स्क्विड गेमको रहस्य सार्वजनिक गर्दै त्यसको अन्त्य गर्ने प्रयास गर्दछन्। यद्यपि, सिजनको अन्त्यले धेरै दर्शकलाई निराश तुल्याएको छ। सामाजिक सञ्जालमा दर्शकहरूले मिश्रित प्रतिक्रिया दिएका छन्, विशेष गरी केही मनपर्ने पात्रहरूको मृत्युले भावुक बनाएको छ भने खेलको निरन्तरताले कतिपयलाई असन्तुष्ट बनाएको छ।

तर पनि, रोमाञ्चक प्लट, उत्कृष्ठ निर्देशन र प्रस्तुतिका कारण ‘स्क्विड गेम’ सिजन ३ ले विश्वभर दर्शकहरूको ध्यान तान्न सफल भएको छ।