मन्त्री सवार गाडीको ठक्करबाट बालिका घाइते, भागेको भिडियो सार्वजनिक भएपछि व्यापक आलोचना

ललितपुर । ललितपुरको हरिसिद्धीमा आर्थिक मामिला तथा योजना मन्त्री रामबहादुर मगर सवार सरकारी गाडीले ११ वर्षीया बालिकालाई ठक्कर दिएको घटनाले सामाजिक र राजनीतिक तहमा गम्भीर बहस चर्किएको छ। विशेषगरी, ठक्करपछि गाडी रोक्नुभन्दा सिधै अघि बढेको भिडियोलाई लिएर मन्त्रीको गैरजिम्मेवार व्यवहारप्रति व्यापक आलोचना भइरहेको छ।

प्रत्यक्षदर्शीहरूका अनुसार, बालिका जेब्रा क्रसिङको नजिक बाटो काट्ने क्रममा मन्त्री सवार गाडीले ठक्कर दिएको हो। उक्त गाडी तत्कालै नरोकी घटनास्थलबाट अघि बढेको दृश्य सिसिटिभी फुटेज र मोबाइल भिडियोमार्फत सामाजिक सञ्जालमा भाइरल बनेको छ। एक महिलाले घाइते बालिकालाई सडकबाट उठाउँदै गरेको दृश्यले आमजनताको मन छुएको छ।

सामान्यतया सडक दुर्घटना भवितव्य मानिए पनि मन्त्रीजस्तो जिम्मेवार पदमा रहेकाले देखाउनुपर्ने मानवीयता र कानुनी जिम्मेवारीको गम्भीर अभाव देखिएको भन्दै आलोचना भइरहेको छ। सार्वजनिक पद धारण गरेका व्यक्तिहरूबाट कानून पालना र नागरिकप्रति संवेदनशीलता अपेक्षित हुने जनगुनासो उठेका छन्।

ट्राफिक नियमको नियमित पालना गराउन सर्वसाधारणमाथि कडाइ गरिँदै आएको सन्दर्भमा, सरकारी गाडीबाटै नियम उल्लंघन हुनु अझै खेदजनक ठहरिएको छ। नागरिकहरूले प्रश्न उठाएका छन्— जब कानून बनाउनेहरू स्वयं नियम तोड्छन्, तब आम जनताले कसरी त्यसको पालना गर्ने?

प्रधानमन्त्री केपी शर्मा ओलीले भने घटनालाई “सामान्य” भन्दै यसमा अनावश्यक राजनीतिकरण नगर्न आग्रह गरेका छन्। तर, यो अभिव्यक्तिलाई लिएर सामाजिक सञ्जाल र विभिन्न सार्वजनिक मञ्चहरूमा चर्को आलोचना भइरहेको छ। “११ वर्षीया बालिकालाई ठक्कर दिँदै भाग्नु सामान्य हुनसक्छ?” भन्ने प्रश्न उठिरहेको छ।

विश्लेषकहरू भन्छन्, मन्त्रीजस्तो उच्च पदमा बसेका व्यक्तिबाट यस्तो गैरजिम्मेवार व्यवहार देखिनु नैतिकता, जवाफदेहिता र सार्वजनिक पदको मर्यादामाथि गम्भीर प्रश्न हो। घटनाले सत्ता प्राप्त गरेपछि देखिने दम्भ र कानूनी दायित्वबाट पन्छिने प्रवृत्तिलाई उजागर गरेको छ।

सडक दुर्घटनापछि पीडितलाई सहयोग नगरी भाग्नु केवल अमानवीय व्यवहार मात्रै नभई कानूनी दृष्टिले पनि आपराधिक हो भन्ने आवाज चर्किंदै गएको छ। यसले राज्यसत्ता र नेतृत्व तहमा गहिरो नैतिक संकट रहेको संकेत दिएको जनाइएको छ।

हाल घटनाको अनुसन्धान भइरहेको जनाइएको छ। तर आमनागरिकको चासो भने एउटै छ—अदालतले न्याय दिनेछ कि सत्ता संरक्षणमा घटना ढाकछोप गरिनेछ?