यात्रुवहाक विमान हिन्द महासागरमा दुर्घटनाग्रस्त, पाइलटको सतर्कताले टर्‍यो ठूलो मानवीय क्षति

मोगादिसु। सोमालियाको राजधानी मोगादिसुस्थित एडेन एडे अन्तर्राष्ट्रिय विमानस्थलबाट उडान भरेको स्टार स्काई एयरलाइन्सको एउटा यात्रुवाहक विमान हिन्द महासागरमा दुर्घटनाग्रस्त भएको छ। विमानमा चालक दलसहित ५० जना सवार थिए। दुर्घटनामा मानवीय क्षति भने नभएको पुष्टि गरिएको छ।

मंगलबार दिउँसो मोगादिसुबाट गुरिएलतर्फ उडान भरेको उक्त विमानले आकाश उडान लिने बित्तिकै प्राविधिक खराबीको सामना गरेको थियो। प्रारम्भिक जानकारीअनुसार विमानको इन्जिनले अपेक्षित रूपमा काम नगरेपछि विमानले पूर्ण उचाइ लिन सकेन र नियन्त्रणमा समस्या देखा पर्‍यो।

पाइलटले तत्कालै विमानस्थल फर्कने प्रयास गरे पनि धावनमार्गसम्म सुरक्षित रूपमा पुग्न असम्भव भएपछि विमानलाई विमानस्थल नजिकै रहेको हिन्द महासागरको तटतर्फ मोडिएको थियो। आपतकालीन अवतरणका क्रममा विमान समुद्रको छाल नजिकै दुर्घटनाग्रस्त भयो, जसका कारण विमानको एक पखेटा गम्भीर रूपमा क्षतिग्रस्त भएको छ।

दुर्घटनाको भयावह अवस्थाका बाबजुद पाइलटको सतर्कता, अनुभव र साहसिक निर्णयका कारण सबै यात्रु सुरक्षित रूपमा बाहिर निकालिन सफल भएका छन्। स्थानीय समयअनुसार दुर्घटनापछि केही समयसम्म क्षेत्र तनावपूर्ण बनेको थियो।

घटनाको जानकारी पाउनासाथ विमानस्थल प्राधिकरण र आपतकालीन उद्धार टोली घटनास्थलमा पुगेका थिए। सोमाली नागरिक उड्डयन प्राधिकरणका निर्देशक अहमद मुअल्लीम हसनले विमानमा सवार सबै यात्रु र चालक दलका सदस्यहरू सुरक्षित रहेको पुष्टि गर्दै कुनै पनि हताहत नभएको जानकारी दिएका छन्।

प्राधिकरणका अनुसार दुर्घटनाको कारणबारे विस्तृत प्राविधिक अनुसन्धान सुरु गरिएको छ। प्रारम्भिक रूपमा इन्जिन प्रणालीमा गडबडी भएको आशंका गरिएको छ।

यो घटना पाइलटको सूझबूझ र आपतकालीन व्यवस्थापन क्षमताको उदाहरणका रूपमा हेरिएको छ, जसले सम्भावित ठूलो मानवीय क्षतिबाट सबैलाई जोगाएको छ। 

                                                                                                – एजेन्सीकाे सहयाेगमा