भक्तपुरमा माघ २६ देखि एचपीभी खोप अभियान

भक्तपुर । माघ २६ गतेदेखि भक्तपुर जिल्लामा ह्युमन पापिलोमा भाइरस (एचपीभी) विरुद्धको खोप अभियान औपचारिक रूपमा सञ्चालन हुने भएको छ । यो अभियान राष्ट्रिय खोप कार्यक्रमअन्तर्गत कार्यान्वयन हुन लागेको हो, जसअनुसार जिल्लाका चारवटै नगरपालिकामा पहिचान गरिएका लक्षित समूहका किशोरीहरूलाई विद्यालयमै पुगेर खोप प्रदान गरिनेछ ।

स्वास्थ्य कार्यालय कटुञ्जे, भक्तपुरले आइतबार आयोजित पत्रकार अन्तर्क्रियामार्फत अभियानको कार्ययोजना, कार्यान्वयन विधि तथा लक्षित जनसंख्याको विस्तृत तथ्यांक सार्वजनिक गरेको हो । कार्यालयले उपलब्ध गराएको विवरणअनुसार भक्तपुर जिल्लाभर कक्षा ६ मा अध्ययनरत विद्यार्थीको संख्या ३ हजार ८४९ रहेको छ । यी सबै लक्षित किशोरीहरूलाई विद्यालय केन्द्रित मोडेलमार्फत स्वास्थ्यकर्मीले प्रत्यक्ष रूपमा खोप लगाउने व्यवस्था गरिएको स्वास्थ्य कार्यालय प्रमुख अन्जना खड्काले जानकारी दिइन् ।

खड्काका अनुसार एचपीभी खोप अभियान अघिल्लो वर्षदेखि सुरु गरिएको हो र चालु वर्ष दोस्रो चरणको रूपमा सञ्चालन हुन लागेको छ । आगामी वर्षदेखि यस उमेर समूहका छुटेका किशोरीहरूलाई खोप उपलब्ध नहुने नीति रहेकाले लक्षित सबै किशोरीलाई अनिवार्य रूपमा खोप कार्यक्रममा सहभागी गराउन उनले अभिभावक, विद्यालय प्रशासन तथा सरोकारवाला निकायलाई अनुरोध गरिन् ।

सार्वजनिक तथ्यांकले देखाएअनुसार सूर्यविनायक नगरपालिकामा कक्षा ६ मा अध्ययनरत विद्यार्थी ८८४ जना रहेका छन् । यसबाहेक १० वर्ष उमेर समूहका किशोरी–किशोर ७१ जना, कक्षा ७ देखि १० सम्म अध्ययन छाडेका विद्यार्थी ३० जना तथा ११ देखि १४ वर्ष उमेर समूहका किशोरी–किशोर २० जना रहेका छन् ।

मध्यपुर थिमि नगरपालिकामा कक्षा ६ मा अध्ययनरत विद्यार्थीको संख्या ९२१ रहेको छ । यहाँ १० वर्ष उमेर समूहका किशोरी–किशोर २६ जना रहे पनि कक्षा ७ देखि १० छाडेका तथा ११–१४ वर्ष उमेर समूहका किशोरी–किशोरको संख्या शून्य रहेको तथ्यांकमा उल्लेख गरिएको छ ।

भक्तपुर नगरपालिकामा कक्षा ६ मा अध्ययनरत विद्यार्थीको संख्या सबैभन्दा बढी १ हजार ५१५ रहेको छ । यद्यपि, यस नगरपालिकामा १० वर्ष उमेर समूह, कक्षा ७–१० अध्ययन छाडेका तथा ११–१४ वर्ष उमेर समूहका किशोरी–किशोरको संख्या शून्य देखिएको छ ।

त्यसैगरी, चाँगुनारायण नगरपालिकामा कक्षा ६ का विद्यार्थी ५२९ जना रहेका छन् भने १० वर्ष उमेर समूहका किशोरी–किशोर ६६ जना रहेका छन् । यस नगरपालिकामा पनि कक्षा ७–१० अध्ययन छाडेका तथा ११–१४ वर्ष उमेर समूहका किशोरी–किशोरको संख्या शून्य रहेको तथ्यांकमा उल्लेख छ ।

समग्र जिल्लागत विश्लेषण गर्दा १० वर्ष उमेर समूहका किशोरी–किशोरको संख्या १६३ पुगेको छ । कक्षा ७ देखि १० सम्म अध्ययन छाडेका विद्यार्थी ३० जना तथा ११–१४ वर्ष उमेर समूहका किशोरी–किशोर २० जना रहेका छन् ।

सरोकारवालाहरूका अनुसार यस्ता विस्तृत तथ्यांकले शिक्षा, स्वास्थ्य तथा बालबालिका लक्षित कार्यक्रमहरूको योजना निर्माण, कार्यान्वयन र मूल्याङ्कनलाई प्रभावकारी बनाउन महत्वपूर्ण भूमिका खेल्ने गर्दछ ।

स्वास्थ्य कार्यालयका अनुसार चालु वर्षको विद्यालय केन्द्रित एचपीभी खोप अभियान माघ २६ गतेदेखि फागुन १ गतेसम्म सञ्चालन हुनेछ । उक्त अवधिमा खोप लगाउन छुटेका लक्षित किशोरीहरूलाई फागुन ४ र ५ गते नजिकका स्वास्थ्य संस्था तथा स्वास्थ्य चौकीमार्फत खोप उपलब्ध गराइनेछ ।