एसईई नतिजा सार्वजनिक : गणितमा सबैभन्दा धेरै अनुत्तीर्ण

एसईई २०८१ परीक्षाफल – मुख्य हाइलाइट्स

• उत्तीर्ण दर: कुल ५,१४,०७१ मध्ये ६१.८१% विद्यार्थी कक्षा ११ पढ्न योग्य।
• नन-ग्रेडेड (अनुत्तीर्ण): करिब ३८% विद्यार्थी, गतवर्षको ५२% को तुलनामा सुधार।
• गणितमा सबैभन्दा धेरै अनुत्तीर्ण: १,२८,२१५ जना।

काठमाडौं । विद्यालय शिक्षाको महत्वपूर्ण आधार मानिने माध्यमिक शिक्षा परीक्षा (एसईई) को परीक्षाफल शुक्रबार साँझ सार्वजनिक गरिएको छ। राष्ट्रिय परीक्षा बोर्डका अनुसार यो वर्ष परीक्षामा सहभागी भएका कुल ५ लाख १४ हजार ७१ जना विद्यार्थीमध्ये झन्डै ६१.८१ प्रतिशतले मात्र कक्षा ११ अध्ययन गर्न सक्ने ‘ग्रेड’ प्राप्त गरेका छन्।

गत वर्ष मात्र ४८ प्रतिशत विद्यार्थीले कक्षा ११ पढ्ने योग्यता प्राप्त गरेका थिए भने बाँकी ५२ प्रतिशत ‘नन-ग्रेडेड’ भएका थिए। यस वर्ष त्यो अनुपात घटेर ३८ प्रतिशत पुगेको छ। प्रधानमन्त्री केपी शर्मा ओलीले पूर्वाञ्चल विश्वविद्यालयको दीक्षान्त समारोहमा यसपटक ६० देखि ६५ प्रतिशतबीच विद्यार्थी उत्तीर्ण हुने अपेक्षा गरिएको बताएका थिए।

ग्रेड वितरण

बोर्डका अनुसार उत्तीर्ण विद्यार्थीहरूमध्ये—

• जीपीए ३.६ देखि ४.० पाउने: ४८,१७७ जना
• जीपीए ३.२ देखि ३.६: ८१,३८५ जना
• जीपीए २.८ देखि ३.२: ७९,१२४ जना
• जीपीए २.४ देखि २.८: ४८,४७९ जना
• जीपीए २.० देखि २.४: ४,१२६ जना
• जीपीए १.६ देखि २.०: ८ जना

प्रदेशगत परिणाम

उत्तीर्ण विद्यार्थीहरूको संख्या प्रदेश अनुसार यस्तो छ:

• कोशी: ४७,८३५
• मधेश: ५९,७४९
• बागमती: १,१९,५१७
• गण्डकी: ४७,८४९
• लुम्बिनी: ५७,६८७
• कर्णाली: ४६,४५५
• सुदूरपश्चिम: ५९,८०४

विषयगत कमजोरी: गणितमै बढी फेल

परीक्षा नियन्त्रण कार्यालयका अनुसार विषयगत रूपमा सबैभन्दा धेरै विद्यार्थी गणितमा ‘नन-ग्रेडेड’ भएका छन्। कुल १,२८,२१५ जना विद्यार्थी गणितमा अनुत्तीर्ण भएका छन्। त्यसपछि अङ्ग्रेजीमा ८०,६७२, विज्ञान र प्रविधिमा ७९,२७१, नेपालीमा ५४,७३५ र सामाजिक शिक्षामा ५३,१८६ विद्यार्थी अनुत्तीर्ण भएका छन्। अर्थशास्त्रमा ४२,१५० र अतिरिक्त गणितमा १८,२२२ जनाले न्यूनतम ग्रेड ल्याउन सकेनन्।

परीक्षा बोर्डका अध्यक्ष महाश्रम शर्माका अनुसार, "यसपालि पनि गणितमा विद्यार्थीहरू कमजोर भएको देखिन्छ।"

उत्तीर्ण हुने न्यूनतम अङ्क

एसईईमा सफल हुन विद्यार्थीले सैद्धान्तिक परीक्षा (७५ पूर्णाङ्क) मा कम्तीमा ३५ प्रतिशत (२७ अङ्क) र प्रयोगात्मक वा आन्तरिक मूल्याङ्कन (२५ पूर्णाङ्क) मा ४० प्रतिशत (१० अङ्क) प्राप्त गर्नुपर्नेछ।

२०७८ सालदेखि लागू गरिएको ‘लेटर ग्रेडिङ’ प्रणालीअनुसार न्यूनतम योग्यता नपुगेका विद्यार्थीले प्रमाणपत्र प्राप्त गर्दैनन्। गत वर्ष ९० हजार विद्यार्थी अनुत्तीर्ण भएका थिए, जसमा करिब ७५ हजारले यस वर्ष पुनः परीक्षा दिएका थिए।

विशेष सहभागी र तथ्याङ्क

यस वर्ष बाल सुधारगृह तथा कारागारबाट ४८ जना, लैङ्गिक तथा यौनिक अल्पसङ्ख्यक समुदायबाट ३० जना, मनाङबाट ४६ जना र काठमाडौँबाट सबैभन्दा धेरै करिब ३९ हजार विद्यार्थी एसईईमा सहभागी भए।

आन्दोलनबीच पनि समयमै नतिजा

चैतमा सम्पन्न एसईई परीक्षा गत वर्षभन्दा ५० हजार बढी विद्यार्थीले दिएका थिए। शिक्षक आन्दोलनकै बीच बोर्डले उत्तरपुस्तिका मूल्याङ्कन ५० भन्दा बढी स्थानमा सम्पन्न गर्दै नतिजा सार्वजनिक गरेको हो। आन्दोलनका कारण एक साता ढिलाइ भएको परीक्षा नियन्त्रण कार्यालयले जनाएको छ।

पूरक परीक्षा: साउन २९ देखि

बोर्डले दुई विषयसम्म ‘नन-ग्रेडेड’ भएका विद्यार्थीका लागि साउन २९ गतेदेखि ग्रेडवृद्धि परीक्षा सुरु हुने जनाएको छ। अध्यक्ष शर्माका अनुसार यस वर्ष सबै विषयका लागि पूरक परीक्षा दिन पाउने व्यवस्था गरिएको छ।