जिमेलमा 'अनसब्सक्राइब' फिचर : अब अनावश्यक ईमेल हटाउन मात्र एक क्लिक

काठमाडौं । गुगलले जिमेल प्रयोगकर्ताहरूका लागि 'म्यानेज सब्सक्रिप्सन' नामक नयाँ फिचर सार्वजनिक गरेको छ। यो फिचरमार्फत प्रयोगकर्ताहरूले इनबक्समा भरिएका अनावश्यक वा झन्झटिला ईमेलहरू एकै क्लिकमा हटाउन सक्नेछन्।

नयाँ फिचरले प्रयोगकर्ताको इनबक्समा आउने सक्रिय सब्सक्रिप्सनका ईमेलहरूको सूची देखाउँछ, र सबैभन्दा बढी ईमेल पठाउने प्रेषकहरूलाई शीर्ष स्थानमा राख्छ। प्रयोगकर्ताले चाहेका प्रेषकहरूको छेउमै रहेको 'अनसब्सक्राइब' बटन थिचेर सजिलै मेलिङ सूचीबाट हटाउन सक्नेछन्।

यस प्रणालीले प्रयोगकर्तालाई विगत केही हप्तामा कुन प्रेषकबाट कति ईमेल प्राप्त भएको हो भन्ने तथ्यांक पनि देखाउँछ। प्रयोगकर्ताले कुनै निश्चित प्रेषकमा क्लिक गर्दा उनीहरूले पठाएका सबै ईमेलहरूको सूची हेर्न सक्नेछन्, र त्यहीँबाट सीधै अनसब्सक्राइब गर्न सकिनेछ।

गुगलले यो फिचर वेब भर्सनको जिमेलमा जुलाई ८ (मङ्गलबार) देखि लागू गरिसकेको छ। एन्ड्रोइड प्रयोगकर्ताहरूले जुलाई १४ देखि र आइओएस प्रयोगकर्ताहरूले जुलाई २१ देखि यो फिचर प्राप्त गर्न सक्नेछन्। यद्यपि, सबै प्रयोगकर्तासम्म सुविधा पुग्न केही साता लाग्न सक्ने बताइएको छ।

फिचरमा जान वा त्यसमा पहुँच गर्न प्रयोगकर्ताले जिमेलको बायाँ कुनामा रहेको नेभिगेसन मेनु खोल्नुपर्छ। त्यसपछि 'Promotions' सेक्सनमुनि रहेको 'More' मा क्लिक गर्दा 'Manage subscriptions' भन्ने विकल्प देखिनेछ।

गुगलको यो नयाँ प्रयासले प्रयोगकर्ताको इनबक्स व्यवस्थापनलाई अझ सहज, छरितो र प्रभावकारी बनाउने अपेक्षा गरिएको छ। नेपाल सहित विश्वका धेरै देशका व्यक्तिगत गुगल खाता रहेका, गुगल वर्कस्पेस प्रयोगकर्ता तथा वर्कस्पेस व्यक्तिगत सदस्यहरूका लागि यो फिचर उपलब्ध हुनेछ।