उद्योग तथा वाणिज्य कार्यालय सूर्यविनायक भक्तपुरको नवनिर्मित भवन उद्घाटन

भक्तपुर । भक्तपुरको सूर्यविनायकमा निर्माण सम्पन्न भएको उद्योग तथा वाणिज्य कार्यालयको नयाँ भवनको बिहीबार एक विशेष समारोहका बीच उद्घाटन गरिएको छ । बागमती प्रदेश सरकारअन्तर्गत उद्योग, वाणिज्य, भूमि तथा प्रशासन मन्त्रालयकी मन्त्री सुकमाया तामांगले शिलापत्र अनावरण र रिबन काटेर भवनको औपचारिक उद्घाटन गरेकी हुन् ।

सूर्यविनायक नगरपालिका–८ मा अवस्थित कार्यालयको आफ्नै तीन रोपनी पाँच आना एक पैसा जग्गामध्ये एक हजार चारसय वर्गफिट क्षेत्रफलमा नयाँ भवन निर्माण गरिएको हो । यसअघि कार्यालय एकतले जीर्ण भवनमा सञ्चालन हुँदै आएको थियो, जुन भत्काएर अहिले साढे तीन तल्लाको आधुनिक भवन निर्माण गरिएको हो ।

बागमती प्रदेश सरकारको बजेटमार्फत निर्माण सम्पन्न भएको यो भवनको अनुमानित लागत तीन करोड ३१ लाख ३२ हजार रुपैयाँभन्दा बढी रहेकोमा भवन दुई करोड ९५ लाख रुपैयाँमा सम्पन्न गरिएको र समयावधि अगावै तयार भई हस्तान्तरण गरिएको जानकारी दिइएको छ ।

उद्घाटन समारोहमा भक्तपुरका प्रमुख जिल्ला अधिकारी भरतमणि पाण्डे, जिल्ला समन्वय समिति प्रमुख ईश्वरबहादुर थापा, बागमती प्रदेश सांसद सुरेश श्रेष्ठ, डा. राजेन्द्रमान श्रेष्ठ, धनेश्वरी प्रजापति, भावना श्रेष्ठलगायतका व्यक्तिहरू उपस्थिति रहेको थियो ।

समारोहको अध्यक्षता कार्यालय प्रमुख रामप्रसाद कुस्माले गरेका थिए भने, धन्यवाद ज्ञापन कार्यालयका शिक्षक लक्ष्मीप्रसाद कासुलाले गरेका थिए ।