वर्षामा कपडाबाट दुर्गन्ध आउँछ ? अब चिन्ता गर्नुपर्दैन, भान्सामै पाइन्छ घरेलु सामग्री

काठमाडौ । वर्षा याम सुरु भएसँगै कपडा सुकाउन समस्या हुने र ढिलो हुने गर्दछ । जसको कारण त्यसबाट दुर्गन्ध आउने समस्या धेरैको साझा पीडा बन्ने गर्छ । लगातारको झरी, कम घाम र आद्रताको वातावरणले गर्दा कपडा चिसो रहने हुँदा गन्ध आउन थाल्छ । तर अब चिन्ता लिनु पर्दैन, किनभने तपाईँको भान्सामै पाइने केही सरल घरेलु सामग्रीले यो समस्या सजिलै समाधान गर्न सकिन्छ ।

यहाँ प्रस्तुत छन् वर्षायाममा कपडालाई दुर्गन्धमुक्त बनाउने तीन प्रभावकारी सामान्य उपायः

१. कागतीको रस – प्राकृतिक ताजगीको स्रोत

कपडा धुने पानीमा आधा काटेको कागतीको रस मिसाएर कपडा केही समय भिजाउनुहोस् । त्यसपछि सामान्य रूपमा धुनुहोस् र राम्रोसँग सुकाउनुहोस् । यसले न केवल दुर्गन्ध हटाउँछ, तर कपडामा ताजगीको महसुस पनि गराउँछ ।

२. बेकिंग सोडा – सफाइ र सुगन्ध दुबैका लागि

धेरैजसो भान्सामा पाइने बेकिंग सोडा पनि कपडाबाट गन्ध हटाउने उत्कृष्ट विकल्प हो । धुने बेलामा थोरै मात्रामा बेकिंग सोडा डिटरजेण्ट पाउडरमा मिसाएर कपडा धुनुहोस् । यसले दुर्गन्धसँगै कपडाको फोहोर पनि राम्रोसँग हटाउँछ ।

३. भिनेगर – गन्ध हटाउने प्राकृतिक समाधान

एक बाल्टीन पानीमा २–३ चम्चा भिनेगरको झोल हालेर कपडा केही समय भिजाउनुहोस् । त्यसपछि सामान्य तरिकाले धोएर सुकाउनुहोस् । भिनेगरले कपडाको गन्ध हटाउने मात्र होइन, कपडालाई नरम र ताजा बनाउने काम पनि गर्छ । यसका साथै कपडा सुकाउने बेलामा हल्का स्प्रेको मद्दतबाट हल्का रूपमा प्रयोग गर्न पनि सकिन्छ ।

४. सुकाउने तरिकामा सावधानी अपनाउनुस्

घाम नलाग्ने अवस्थामा कपडा घरभित्रै सुकाउनु परेमा खुला हावा हुने वा भेन्टिलेसन भएको कोठा रोज्नुस् । यदि यो सुविधा नभएको अवस्थामा पंखा वा एग्जस्ट फ्यानको प्रयोगले हावा चल्ने व्यवस्था गर्न सकिन्छ, जसले कपडा चाँडो सुकाउँछ र गन्ध आउन नदिन सहयोग गर्छ ।

वर्षामा कपडाबाट दुर्गन्ध आउनु स्वाभाविक हो । तर माथिका घरेलु उपायहरू अपनाउँदा सजिलै यो समस्याबाट छुटकारा पाउन सकिन्छ । अब सुगन्धित परफ्युमको भर पर्नु पर्ने छैन — तपाईँका कपडाहरू आफैँ ताजा र सुगन्धित रहनेछन् । 

–एजेन्सीको सहयोगमा