एआईको प्रभाव: अग्रणी स्टोरेज कम्पनीहरूको उत्पादन पूर्ण रूपमा बिक्री

काठमाडौं। कृत्रिम बुद्धिमत्ता (एआई) क्षेत्रमा तीव्र विस्तारसँगै डाटा भण्डारण उपकरणको माग अभूतपूर्व रूपमा बढेको छ। यसको प्रत्यक्ष प्रभाव विश्वका अग्रणी हार्ड ड्राइभ उत्पादक कम्पनीहरूमा देखिन थालेको छ। Western Digital र Seagate Technology ले सन् २०२६ का लागि आफ्नो उच्च-क्षमताको स्टोरेज उत्पादन लगभग पूर्ण रूपमा बिक्री भइसकेको जानकारी दिएका छन्।

वेस्टर्न डिजिटलका प्रमुख कार्यकारी अधिकृत Irving Tan ले हालैको आम्दानी कलमा कम्पनीको क्यालेन्डर वर्ष २०२६ को अधिकांश उत्पादन क्षमता अग्रिम रूपमा प्रमुख ग्राहकहरूलाई छुट्याइसकिएको बताएका छन्। उनका अनुसार कम्पनीका शीर्ष सात ग्राहकहरूले उपलब्ध क्षमताको ठूलो हिस्सा सुरक्षित गरिसकेका छन्। तीमध्ये तीन ग्राहकसँग २०२७ र २०२८ सम्मका लागि दीर्घकालीन सम्झौतासमेत भइसकेको छ।

कम्पनीले उद्यम (इन्टरप्राइज) ग्राहकहरूबाट बढ्दो मागका कारण उपभोक्ता बजारबाट हुने आम्दानी घट्दै गएको संकेत पनि गरेको छ। हाल उपभोक्ता खण्डले कम्पनीको कुल राजस्वको करिब पाँच प्रतिशत मात्र ओगटेको जनाइएको छ।

त्यसैगरी, सीगेट टेक्नोलोजीका अध्यक्ष तथा सीईओ Dave Mosley ले विश्वभरका क्लाउड डाटा केन्द्रहरूमा उच्च-क्षमताको ‘नियरलाइन’ ड्राइभहरूको माग निरन्तर बढिरहेको बताएका छन्। उनका अनुसार सन् २०२६ का लागि नियरलाइन स्टोरेज क्षमता पूर्ण रूपमा छुट्याइसकिएको छ भने कम्पनीले अब २०२७ को पहिलो अर्धवार्षिकका लागि अर्डर लिन सुरु गर्ने तयारी गरिरहेको छ। २०२७ सम्म प्रमुख क्लाउड ग्राहकहरूसँग सम्झौता भइसकेको र २०२८ को मागबारे छलफल भइरहेको जानकारी पनि उनले दिएका छन्।

उद्योग विज्ञहरूका अनुसार एआई कम्पनीहरूको तीव्र विस्तारले प्रोसेसर, मेमोरी र स्टोरेज जस्ता हार्डवेयरको माग असाधारण रूपमा बढाएको छ। विशेषगरी मेमोरी अभावका कारण र्यामको मूल्यमा उल्लेखनीय वृद्धि भइसकेको छ।

गत वर्षको अन्त्यतिर सार्वजनिक एक विश्लेषणअनुसार Samsung ले आफ्नो DDR5 र्यामको थोक सम्झौता मूल्य झन्डै शतप्रतिशतसम्म बढाएको थियो, जसका कारण प्रति युनिट मूल्य १९.५० अमेरिकी डलर पुगेको बताइएको थियो। एचपी, डेल र लेनोभो जस्ता प्रमुख ब्रान्डहरूले सामसङबाट र्याम खरिद गर्ने भएकाले यसको प्रभाव विश्वव्यापी बजारमा देखिएको छ। मूल्यवृद्धिको प्रमुख कारण स्टक अभावलाई मानिएको छ।

यता, गेम कन्सोल निर्माता तथा अन्य टेक कम्पनीहरूले सम्भावित हार्डवेयर अभावलाई ध्यानमा राख्दै आफ्नो आगामी उत्पादन र लन्च योजनामा पुनर्विचार गरिरहेको अन्तर्राष्ट्रिय सञ्चारमाध्यमहरूले जनाएका छन्।

हालैका महिनाहरूमा ल्यापटप, स्मार्टफोन तथा अन्य इलेक्ट्रोनिक उपकरणहरूको मूल्यसमेत बढ्दो क्रममा रहेको छ। पछिल्लो अवस्थाले एआईसम्बन्धी माग तत्काल सुस्त नहुने संकेत गरेको छ, जसको प्रत्यक्ष प्रभाव उपभोक्ता बजारमा मूल्यवृद्धि र सीमित उपलब्धताका रूपमा देखिन सक्ने विश्लेषण गरिएको छ।

विशेषज्ञहरूका अनुसार यदि उत्पादन क्षमता विस्तार तीव्र गतिमा हुन सकेन भने आगामी दिनमा स्मार्टफोन, ट्याबलेट, कम्प्युटर तथा अन्य डिजिटल उपकरणहरूको मूल्यमा थप दबाब पर्न सक्नेछ।